Ողջո'ւյն։

Շնորհակալ ենք, որ հետաքրքրված եք Արցախով և Ս. Հակոբավանքով։

Հիշե՛նք, որ ամեն անգամ Արցախ այցելելով՝ նախ ինքներս ենք զորանում, ապա
զորացնում՝ այնտեղ ապրող մեր հայրենակիցներին։

Այս անգամ էլ՝ դեկտեմբերի 16-18-ը, Սուրբ Հակոբ Մծբնա Հայրապետի հիշատակի օրվա առթիվ
ուխտագնացությամբ գնում ենք Արցախի Ս. Հակոբավանք՝ լիցքավորվելու և զորացնելու։

Ի դեպ` տոնի առթիվ Մայր Աթոռ Սուրբ Էջմիածնից բերվելու է Ս. Հակոբ Մծբնա հայրապետի
մասունքակիր աջը, որ իր օրհնությունը բաշխի Արցախ աշխարհին։ Ս. Պատարագի ավարտին
մասունքով բոլոր ուխտավորների օրհնության կարգ կկատարվի։

Մասնակցելու համար խնդրում ենք անպայման գրանցվել։

ԾՐԱԳՐԻ ՆԵՐԿԱՅԱՑՈՒՄ

Մշակույթ, Ինքնություն, Պետականություն

Համախմբվենք ու պաշտպանենք մեր ինքնությունը

Հայաստանի ու Արցախի մի շարք մշակութային, հասարակական, հոգեւր գործիչներ համախմբվել և նախաձեռնել են Արցախի Ս․ Հակոբավանքի վերկանգնումը։
Ինչո՞ւ է կարեւոր վանքի վերականգնումը հենց այսօր։
Առաջին հերթին որովհետև վանքի զորությունն անհրաժեշտ է հայ մարդուն հայոց պատմության այս դժվարին օրերին, որովհետև Ս. Հակոբավանքի սրբությունը ոգեղեն պայքարի, հայի կրոնական և ազգային ինքնության հիմքն է, այն, ինչը պահպանելու համար հարկ է գոտեպնդվել և միաժամանակ այն, ինչը ուժ և կորով է հաղորդում պայքարի ելած հային։


2020թ․ պատերազմի և դրան հետեւած արցախյան տարածքների օկուպացիայի արդյունքում հայկական մշակութային 90 կոթող ոչնչացվել, վնասվել կամ ենթարկվում են ձեւափոխման Ադրբեջանի կողմից։ Հարյուրավոր հուշարձաններ վտանգված են, քանի որ գտնվում են օկուպացիայի մեջ։ Արդեն հրապարակումներ կան ադրբեջանական մամուլում, որտեղ սկսել են «հիմնավորումներ» ստեղծել Ս․ Հակոբավանքի յուրացման համար։ Ուստի այսօր Ս. Հակոբավանքը մարմնավորում է Արցախի պատմամշակութային ամբողջ ժառանգությունը, որը մեր հազարամյակների գոյության ու ինքնության ապացույցներից է մեր իսկ հողում։

Վանքի վերականգնման ճարտարապետական նախագիծն արդեն պատրաստ է․ հեղինակը բազմաթիվ եկեղեցիների, այդ թվում՝ Դադիվանքի վերականգնման նախագծերի հեղինակ Սամվել Այվազյանն է։
Անհրաժեշտ գումարն էլ հավաքվելու է աշխարհասփյուռ հայերի հանգանակություններով։ reArmenia հարթակում արդեն մեկնարկել է դրամահավաքը:
Այսօր յուրաքանչյուրս՝ որպես մեր մշակույթի ու պատմության ժառանգորդ, որպես հայկական պետականությունը զորացնելու պատրաստակամ հայ մարդ, կարող ենք մեր գործուն մասնակցությամբ համախմբվել կարեւոր գաղափարների շուրջ ու ոտքի հանել մեր ազգին, ամրացնել թուլացած պետության թիկունքը:
Ի դեպ՝ մեր ինքնության հայելին՝ մեր էպոսը, հետաքրքիր խորհրդանիշ է տալիս: Ծուռ Դավիթը Սասուն -պետության փառքը վերականգնելուց առաջ նախ վերակառուցում է Մարութավանքը. նախ հոգեւոր զարթոնք է ունենում, հետո՝ կարողանում է արժանանալ տիեզերական զենք ու զրահը կրելու իրավունքին ու հաղթել թշնամուն:

Այնպես, որ այսօր մեր պետականության զարթոնքին միանալու հնարավորություն ունենք յուրաքանչյուրս: Բազմաթիվ կազմակերպություններ ու անհատներ արդեն միացել են. Միացե՛ք եւ դուք:

Հենց այդ նպատակով մի շարք կազմակերպություններ, գիտնականներ, մտավորականներ, մտահոգ անձիք համախմբվել են կարեւոր այս գաղափարի շուրջ՝ վերականգնել Արցախի Մարտակերտի շրջանի Քոլատակ գյուղի Ս. Հակոբավանքը, ինչը կարևոր ուղերձ կդառնա աշխարհի բոլոր կողմերում ապրող հայերի համար։ Ս. Հակոբավանքի վերականգնումը նաև կխթանի Արցախի մշակութային, հոգեւոր, տնտեսական և զբոսաշրջային ոլորտների զարգացմանը։